ساعة غروب

ساعة مغربية كده قبل الفطار بدقايق وقفت ع الشباك عجبنى منظر الشمس وهى بتغرب قوى.. تصدقوا اول مرة ألاحظه..يمكن عشان دلوقتى انا بعيدة عن التليفزيون فبقيت الاحظ حاجات كتير حوليا..مقدرتش اقول غير سبحان الله ع المنظر الجميل ده.. حسيت سعتها قد ايه ربنا جميل وبيحب الجمال فعلا.. وحسيت قد ايه الدنيا دى كبيرة وواسعة واحنا صغيرين قوى.. أثر فى المنظر لدرجة انى قلت لازم الفت نظركم ليه.. يمكن يكون فيكم اللى مش بياخد باله منه.. بس دلوقتى هيقدر يستمتع بيه

يوميات.. طالبة.. مفروسه

غيبت كتير.. بس والله غصب عنى.. المحاضرات نازلة عليا زى المطر.. ومش عارفة ادخل نت خالص

ده أول بوست اكتبه من اسيوط

............................................................................

اول ما وصلت اسيوط قلت يا بت الدراسة هتبدأ وتتجمعى بأصحابك تانى.. وهبطل اكتئاب بقى

لكن ع مين؟؟ ورايا ورايا لأخر الدنيا

قلت اروح الكلية قبل الدراسة بيوم اشوف الجداول وارتب نفسى.. ما انا بقيت ف تالتة خلاص يعنى هبطل لعب وتنطيط السنة اللى فاتت

بصيت ع سكشنى.. قال ايه؟؟ نقلونى لسكشن الاولاد

بعيد عنكم لقيت موسيقى براف هارد بترن ف ودانى ومش شايفة قدامى

يا فرحة ما تمت

سندت نفسى ع اقرب حيطة وشريط ذكرياتى المؤلمة مع السكشن ده سنه اولى بيمر قدامى

افتكرت ف الاول ان نظرى ضعيف ..بصيت مرة واتنين وتلاتة

لكن مفيش فايده نظرى طلع 6 ع 6 للأسف؟؟؟

رحت يمين رحت شمال معرفتش اعمل حاجة

واستسلمت لحقيقة انى لازم هقضى السنة دى معاهم

ما علينا.. حضرت اول سكشن وطول الوقت بفكر انا عملت ايه ف حباتى غلط عشان ارجع السكشن ده تانى

ملقيتش حاجة تستاهل العقوبة دى؟؟؟؟ وقلت ف نفسى اصبرى ع البلاء يمكن يجى الفرج

روحت السكن وقررت انى ما دام انا مفروسة من الكلية كده يبقى مش لازم اكتم ف نفسى وإلا هيجرى لى حاجة

فقررت اكتب لكم.. يمكن تهونى عليا شوية

The LoSt...mE ...!!!

كل سنة وانتم طيبين ورمضان كريم عليكم... البوست ده آخر بوست هكتبه من بيتنا العزيز..يمكن اكون زعلانة شوية.. مش عشان الاجازة خلصت ... لأ طبعا لان حياتى بتبدأ مع بداية السنة.. بس عشان هقضى رمضان كله بعيد عن بيتنا!! ضريبة العلم بقى هنقول ايه .. قدر الله وما شاء فعل
مش هكذب عليكم واقول ان الاجازة كانت ممتعة ولذيذة وطعمة...الخ
لان بصراحة ان الاجازة دى انا مكنتش لاقية نفسى!!

هتقولوا يعنى ايه؟؟

يعنى مثلا عمر ما واحد منكم سأل نفسة هو ليه موجود؟ يعنى ايه الفايدة من حياته؟؟



عارفين لما الواحد يصحى من النوم كده وهو مش عارف هدفه ف الدنيا دى ايه؟؟ أو هل اللى هو بيعمله ده بيفيد حد ولا لأ..وتلاقى سحابة من الاكتئاب هبت ع حياتك من اللاشئ واللاوجود
زمان كنت ممكن الاقى نفسى وانا برسم .. او ف شخصية ناجحة اخدها مثل اعلى ..أو ف حاجة كنت عايزة اعملها وافرح ان انا حققتها.. بس دلوقتى ده مبقاش كفاية
كنت لما ابقى تايهه كده برجع لقلبى وهو يدلنى ..بس ده برضه مبقاش كفاية
بدأت احس ان انا مش انا

هتقولوا الله هى هتجننا ولا ايه؟؟

هتعمل ايه لما تلاقى الألوان حواليك بس انت مش شايف غير ابيض واسود؟؟؟ لما تحس ان الدنيا بتجرى بسرعة من حواليك وانت مش قادر تتحرك؟؟ أو انك ببساطة مطرح ما توديك الدنيا هتقعد

هتقولوا ده انت كئيبة قوى

مبقتش عارفة هل الطبيعى ان ابقى كئيبة وان السعادة مجرد طفرة ف حياتى.. ولا العكس
وهل السعادة تنبع مننا ولا بنستمدها من الآخرين
وهل فيه اساسا شئ اسمه السعاده؟؟ ولا دى مجرد كلمة اخترعناها حطينا فيها امل للخروج من الحالة اللى احنا عايشينها
هحاول أدور عليها .. ولو لقيتها.. أكيد هتكونوا اول ناس تعرفوا
وربنا يجعل البوست ده آخر بوستات الاكتئاب

let it go ....

there is things in the past

we can't let it go

although it hurts

we think the pain will go

but it never do

we just keep bleeding