سياسة..ال هاكونا ماتاتا

يوم عادى زى أي يوم، صحيت من النوم وعملت كباية الشاي ،وأنا ماسكة ريموت التليفزيون ولسه بقول يا هادى لقيت كده خير اللهم اجعله خير الواد اخويا الصغير(13 سنه) هبط قدامى وهبت عواصفه و زعابيبه عليا ع الصبح وفرض الحصار ع منطقة التليفزيون وهو دماغه وألف سيف انه عايز يشوف مسلسل الكرتون بتاعه

أنا:يا بني يا حبيبي انت كبرت خلاص ع الحاجات دى
كارتون ايه اللى انت عايزه؟؟

هو: كل واحد وليه اهتماماته..

أنا: اهتمامات ايه.. هو انت حتتفرج ع كورة ولا حتى مصارعة زى بقيت الولاد.. ده كارتوووووووووون

هو:يوووووووه .. هاتى الريموت وخلاص

وبعد مناقشات ومناورات من غير فايدة وصراخه الحاد اللى يصم ودان كل شخص على بعد 50كيلو من بيتنا.. قررت الاستسلام وأديته الريموت وأمري لله
ونظراً لان مفيش حاجة تانى اقدر اعملها فخضعت للأحكام العرفية وقعت أتفرج معاه ع الكارتون بتاعه وقلت ف نفسى يمكن اقدر افهم دماغه

كان اسم الكارتون اللى بنتفرج عليه: تيمون و بومبه
اتنين من الحيوانات(نمس و خنزير) عايشين ف الغابة ويتبعوا سياسة معينه ف حياتهم

انا: هى الطريقة اللى هم عايشين بيها دى اسمها هاكونا ايه؟؟

هو: هاكونا ماتاتا

انا: ويعنى ايه بقى يا سيدي هاكونا ماتاتا بتاعتك دى؟؟

هو: دى طريقة الواحد ممكن يعيش بيها ومعناها انك تنفض لكل حاجة ممكن تزعلك ، انك تنسى الماضي اللى يغيظ وتبص بس للمستقبل ، انك تساعد كل اللى يطلب مساعدتك، وان صحبك اهم عندك من كل شئ ، وانك عمرك ما تكره حد ، انك تعيش حياتك ببساطة، وتستمتع بكل شئ جميل حواليك... يعنى بالعربي كده متعقدهاش

طب و مادام الواحد يقدر يعيش كده .. ليه كلنا منتبعش السياسة دى ف حياتنا.. تخيلوا العالم هيبقى ازاى لو كل واحد عايش بالشكل ده ..عجبتنى الحكاية وقررت انى من النهار ده أعيش ع طريقة..هاكونا ماتاتا

أول تاج .........ف مدونتى

اسم مدونتك؟
teens world2007

لماذا اخترته؟وما هى نيتك من وراءه؟
it was written by ateen and teens will read it so it's teens world

هل فكرت ف إغلاق مدونتك؟ و السبب؟
لا ، لانها المتنفس الوحيد ليا

صورتك ف المدونة؟ و رمزيتها؟
قطة متوحشة... اعتقد ان ده ليه علاقة بشخصيتى

لماذا دخلت عالم التدوين من الاساس؟
عشان أقابل ناس جديدة و أطور من طريقة تفكيرى

جملة قيلت لك ف وصف مدونتك؟
جميلة

التعليقات بالنسبة لك...أهميتها؟
مش مهم عندى التعليق قد ما يهمنى انى قلت اللى ف نفسى وارتحت

أحلى بوست كتبته..ضع اللينك؟ ثم اذكر لماذا؟
بلااااااااااااش فضايح
أفضل بوست قرأته؟ ضع لينكه؟
ميكروويف ولا قطر لأنه بيمثل معاناتي طول السنة

أفضل مدونة قرأتها؟
عاشوريات

حد قل أدبه ف التعليق؟ إيه رد فعلك؟
احذف التعليق و ربنا يسامحه بقى

أسوء بوست؟ أسوء مدونة؟
والله لسه ما شوفتش

هيحصل ايه لإيميلك لما تموت؟
حكتب الباسوورد ف ورقة وأحطها ف زجاجة وارميها ف البحر

على غرار فيلم the message in the bottle

أديت الباسوورد لحد قبل كده؟
ايوة

اسمك المشهور بيه وسط أصحابك؟
بين أصحابي المقربين ميرو ، ف الكلية السندريلا السمراء

شخصيتك نوعها أيه؟
رومانسية حالمة لسه عايشة ف عالم الروايات

السفر بالنسبة لك؟
مغامرة

وقت فراغك بتعمل فيه أيه؟
غالباً بنام

الموود بتاعك؟
متقلبة

الأكلة المفضلة؟
البيتزا

صفاتك اللى اخدتها من بابا؟
العند وعدم الاقتناع بسهولة وكثرة الجدال و العصبية و... كفاية كده

صفاتك اللى اخدتها من ماما؟
الثقة بالنفس والرومانسية و عدم الاستسلام

اكتر 6 حاجات بتكرها؟
الفشل
الكذب
الألم
التجاهل
الخيانة
كلمة"عادى"

اكتر 6 حاجات بتحبها؟
الجرأة
الصد ق
الموسيقى الهادئة
البحر
الرسم
القطط

الشغل بالنسبة لك؟
متعة

الانترنت بالنسبة لك؟
هواية و تحول لإدمان

أمرره لمين؟
إيمان
mamado
ما علينا

اصحاب ولا

بيقولوا إن الصداقة ممكن تنتهى بحب وإن الحب لا يمكن ينتهى بصداقة

فعلاً الحب مستحيل ينتهى بصداقة, ولو ف يوم واحدة قالت لك : خلينا اصدقاء
اعرف انها بتديلك استمارة 6(بتزحلقك يعنى) لان عمركم ما هترجعوا زى الاول

الصداقة معنى جميل انا بقدسها بس لما تدخل فيها مشاعر تانية بتخلق علاقة
غريبة , فى ناس بتسميه حب, انا بقي بسميه تعود!!!!!!!!!!
عارفين ليه؟؟ لأن الشخص ده انت اتعودت ع طباعه,مميزات,عيوبه
اتعودت تشوفه كل يوم, تقوم تتوهم انك بتحبه, فالعلاقة بتكون نسبيا آمنة
وساعات بتكون متوقعة زيادة عن اللزوم, فى ناس بتحب كده ودول اللى بيتجوزوا
جواز صالونات ........اللى مش عايزين وجع قلب ولا قلبت دماغ

أما الحب بيكون من النظرة الاولى, كيمياء كده بتحصل بين اتنين
الم ف معدتك ملوش سبب كل لما تشوف او حتى تسمع اسم شخص معين
لخبطة ودهولة ف حياتك متعرفش منين؟؟وتلاقى نفسك بتكب مشاعر ع اللى
حواليك(حتى لو كان عم عبده البواب)
وبقيت تبحلق ف النجوم والقمر كأنك اول مرة تشوفهم,ويمكن تكتب شعر وتلحن اغانى
(مع انك اساسا نشاذ..ما علينا)
وبتتذوق الجمال ف كل حته بتروحها زى الورده اللى اول مرة مرة تشم عبيرها والعصافير
تحس انها بتغنى معاك, ولو ف يوم غاب عنك تحس الدنيا فاضية وتغنى وتقول
(عودت عينى على رؤياك....وقلبى سلم سلملك امره

هو ده الحب اللى بسمع عنه ف الروايات والافلام بس لحد دلوقتى نادر لما شوفته
اليومين دول تلاقى الواد ميمى ولا توتو بيحب ف جيجى ولا سوسو ع الشات
وكله بيكدب على كله ,

painful love...

وتعجبتك كيف تتسع المسافة بينهما حتى لم يتبقى منها إلا الفضاء الخالى والصمت

(مقتبس من فيلم some one like u)

بعد فترة من التفكير لاقيت نفسى مش عارفة اكتب حاجة فى المدونة؟؟؟
انا اساساً مش كاتبة ولا شاعرة .. بس عندى كلام عايزة أقوله.. قررت ان انا اكتب عن كل التجارب اللى بتمر عليا .. فى اللى هيقرا.. وفى اللى هيطالب انى اقفلها وخلاص.. مش مهم المهم ان انا قلت اللى ف نفسى و ده السبب الوحيد اللى عملت عشانه مدونة

..................................................................................................................................
من المدهش ازاى حياة الواحد منا بتاخد منحنى غير اللى كان رسمه لنفسه ف يوم من الأيام
يعنى كم مرة كنت عايز تعمل حاجة ولقيت نفسك بتعمل حاجة تانية خالص؟؟؟؟؟؟؟؟؟؟؟؟
متعرفش ازاى ده حصل أو ليه بيحصل؟؟ عمرك حصلك كده؟؟
يعنى انا مثلا ف اولى ثانوى كنت عايزة ادخل كليةألسن لانى بحب اللغات , وف تانية كنت عايزة ادخل كلية علوم قسم كيمياء لانى كنت بحب الكيمياء.. لكن ولا واحدة فيهم كانت عاجباهم ف البيت فقررت ف تالتة انى ادخل صيدلة (كيمياء بالانجليزى)
افتكرت ان انا كده عندى حرية اختيار وان انا هدخل الكلية اللى بحبها و محدش هيفرض عليا حاجة؟؟ لكن هيهات أول ما النتيجة طلعت ابتدى موال كل اسرة ابنها جاب مجموع ( صيدلة ايه اللى انت عايزة تدخليها؟؟ لازم تدخلى طب دى الطب كلية قمة, خسارة مجموعك... ألخ) بالذمة يعنى هى طب تفرق ايه عن صيدلة؟؟؟؟؟؟؟؟؟؟؟؟؟
بعد مباحثات و حوارات و خناقات وتدخل الأهل و الجيران عشان يزودوا الطين بله
ووصلت انا والسيد الوالد لحل وهو ان انا اكتب الرغبة الأولى طب والثانية صيدلة!!
برضه اللى ف دماغهم عملوه وقال إيه بيسمى اللى حصل ده حرية رأى
وعلى رأى محروس الديمقراطية ان انت تقول رأيك واللى انا عايزه هو اللى هيحصل
ولأول مرة ادركت معنى اليمقراطية ف البلد دي , ولسوء حظى أو حسنه يأبى مكتب التنسيق أن يخالف ديكتاتورية الوالد ويدخلنى كلية الطب زى ما تقول كده ديكتاتورية القدر كمان كانت ضدى....
7 سنين يا عالم هقضيهم ف كلية انا مفكرتش ادخلها اصلاًًًَ ... يعنى ده حرام ولا حلال حد يفهمني؟؟؟
ما علينا انا ع العموم انا برمجت نفسى ع الوضع ده وهانت كلها 4 سنين تانى واخلص
كل اللى مضايقنى ان انا اتنازلت عن شىء كان من حقى
أذا كان قرار زى كده انا مقدرتش اخده يبقى ازاى هقدر أكمل؟؟؟
علمونا ف المدارس نقول رأينا وندافع عن حقوقنا وف نفس الوقت علمونا برضه طاعة أولى الأمر طاعة عمياء .. بالذمه دى مش نكتة (:
من كام يوم قررت ان انا اقف مع نفسى شوية وارتب حياتى كنت حاسة ان حياتى ملخبطة فصديق ليا قالى ايه يعنى سيبيها ملخبطة!! معرفتش اقول ايه .. ما انا سيباها ملخبطة بقى لى سنتين.. ووصلت لايه؟؟ ولا حاجة.. فقعد كده مع نفسى وسألتها بداية اللخبطة منين؟؟ ليه انت عايشة كده و خلاص من غير هدف او سبب معين لوجودك؟؟ راح فين حماسك للحياة وان انت عايزة تحسنى من العالم؟؟ راح فين طموحك و حبك لبلدك؟؟ راح فين كل ده؟؟؟
كل ده راح ف اليوم اللى ادركت فيه ان مفيش حاجة اقدر اعملها
اليوم اللى حتى قرار الكلية اللى عايزة ادخلها مقدرتش اخده
شوفت بقى ازاى ممكن تتغير حياتك من غير حتى ما انت متعرف؟؟؟؟؟؟؟